做人難，做香港人更難，事關香港出名生老病死皆不易，衣食住行樣樣難。呢，話口未完啫，又有公共交通機構提出加價，香港人睇怕又要被迫硬食咯。
尋日立法會交通事務委員會開會，討論新巴城巴要求加價十二個巴仙嘅申請，與其話係加價，不如話係搶錢更貼切。有議員鬧爆係「獅子開大口」，皆因過去十年從來冇公共交通機構獲批加價多過一成，咁加法即係想食咗市民隻車啫。新巴城巴代表就噏咗大堆理由，話港鐵西港島線同南港島線開通後，搶咗佢哋一成乘客量，每年少咗三億元收入；車廂入面流動多媒體廣告又冇人接手經營，搞到車費以外嘅收入減少，總之就係欲加之價，何患無詞喇。
即係咁，巴士公司要求加價，就好似打工仔望年年有人工加一樣，在商言商都無可厚非，之不過打工仔今年人工加幅都係得三、四個巴仙咁上下，巴士公司一嘢撳住搶，都好飛擒大咬喎。何況仲要用港鐵搶客呢種咁old school嘅藉口，叫人點接受呀。喂，政府交通規劃差，唔識令巴士同鐵路互補不足，責任喺班眼高手低嘅港產官僚身上，冇理由掉轉槍頭懲罰乘客啫，係咪咁講呀？
話時話，巴士公司一味加價，但係服務質素就唔見有提升。舊年城巴喺深水埗剷上行人路搞出人命，今年九巴大埔翻車更係死傷枕藉，凡此種種，凸顯巴士車長待遇差同工時長嘅問題一直冇改善，加價咪又係肥上瘦下嘅把戲。講到底，港府對公共交通機構監管弱過弱雞，淨係識縱容加價，其餘時間就闊佬懶理，直至爆出大鑊意外先至裝模作樣調查一番，過咗海就係神仙。無王管咯喎，亂象叢生又有乜出奇吖。
唔使講其他，淨係早排兩巴話會按運輸署建議，喺所有巴士座位安裝安全帶，點知講完就算，轉個頭又話冇乘客會佩戴，為咗慳皮藉口多多，擺明將血嘅教訓拋諸腦後。不過大家都見怪不怪咯，港府做嘢不嬲踢一踢郁一郁，以前小巴意外多，就強制小巴乘客佩戴安全帶，對大巴一直放任自流，家陣發生奪命意外先至想亡羊補牢，遲唔遲啲吖，難怪巴士公司睬你都傻喇。
都係嗰句喇，港府冇神經、冇靈魂，監管公共事業盡顯無能，由港鐵到巴士公司，通通係價照加，服務質素照樣差，市民年年捱骨牌式加價狂潮，港府仲唔做好監管責任，港人唔使等來生，今生已經唔想做香港人嘞。唔係講笑，愈來愈多港人用腳投票移民他去，到底港府識唔識醜字點寫吖。