政情：嘆三個囝囝含蓄怕醜 多仔公鄭泳舜恨生女
立法會議員鄭泳舜（Vincent）為三子之父，可以話係議會中嘅「多仔公」。聽日就係父親節喇，Vincent又點同三個囝囝慶祝呢﹖點知Vincent就話都未諗點樣慶祝，又呻三個囝囝含蓄同怕醜，反而羨慕人哋生女喎。
尋日有一個父親節主題嘅茶敍活動，活動係為「爸爸級」嘅議員送上驚喜，即係搵佢哋嘅仔女拍短片祝賀父親節。Vincent未睇條短片已經自己做「期望管理」，話佢三個囝囝好含蓄，仲話佢哋一定係好簡短咁只講一句「父親節快樂」。結果短片播出，真係如佢所講，只得一句「父親節快樂」。睇嚟Vincent對三個囝囝都相當了解。
出門前同囝囝講愛你
雖然Vincent把口就鬧囝囝離譜，又話生女就唔一樣，相信囡囡會講多啲說話氹人，不過佢睇住囝囝嘅短片時都係一面冧樣。佢話，明白男仔係比較含蓄，唔易透露感情，所以佢會主動啲，平日出門時都會同囝囝講句「Love You（愛你）」咁話。