政情：王國強話返內地做生意 「想飲都冇得飲」
內地商機處處，但部分年輕人對返內地發展仍有所保留，尤其傾生意嘅模式，擔心下下要摸酒杯底先「有偈傾」。喺兩地經商嘅廣東社團總會永遠榮譽主席王國強（KK）早前出席一個青年活動時就打破迷思，話依家喺內地同人傾生意，係「想飲都無得你飲」。
叫年輕人多北上了解
早喺八十年代，KK嘅業務已進入內地市場，經常要到內地各省市傾生意。佢承認以前喺內地必須要識飲酒，因為「唔飲真係覺得你唔畀面」。不過隨住內地經濟起飛，商業環境好多都已經制度化，傾生意唔需要再摸酒杯底喇。佢認為香港嘅年輕人應該多啲到內地，實地了解民情，傾生意前最重要都係做足功課，識得入鄉隨俗。
KK大仔王紹基當日都在場，王紹基都認同爸爸睇法，仲話內地係香港年輕人嘅寶庫，佢都努力開拓緊，而當中嘅秘訣就係唔好怕蝕底，因為蝕底係喺任何地方經商都會遇到，「要令蝕咗變成成功嘅經驗」，唔好被偏見影響喎。