政情：接受減廢挑戰 陳維安乘機硬銷立會紀念品
為政府宣傳減廢嘅「大嘥鬼」最近有新搞作，發起「減廢大挑機」行動，要求參加者上載減廢照片到社交平台。唔少政界中人都被「挑機」，其中一位就係立法會秘書長陳維安(Kenneth)。佢分享嘅「減廢法寶」之一就係刻有立法會會徽嘅木製筷子同匙羹，仲話自己會用私伙餐具，唔會用破壞環境嘅「即棄餐具」。立法會紀念品銷情一向麻麻，年年蝕錢，難怪Kenneth都要硬銷喇。
Kenneth嘅減廢法寶其實都有唔少，唔止有私伙餐具，仲有「自攜飯碗」同分別用嚟裝冷、熱飲品嘅「自攜咖啡杯」，真係夠晒環保抵讚。
龐愛蘭用抽濕機水抹地沖廁
另外，天文台台長岑智明同沙田區議員龐愛蘭（Scarlett）都有接受「挑機」。Scarlett就循環再用抽濕機吸出嚟嘅水抹地同埋沖廁所。岑智明嘅法寶就係佢由細用到大嘅手巾仔，仲話絕少用用完即棄嘅紙巾。雖然手巾仔係環保，但如果傷風流鼻水時重複使用，會唔會唔衞生呢﹖