政情：查峯搶手機建制想踢走毛婆

加入調查委員會嘅限期已經喺尋晚午夜截止，而截至尋日中午，一共有七名議員獲提名以供任命成為調查委員會成員，當中有毛婆、專業議政梁繼昌及郭榮鏗三名民主派議員，其餘四人就係獨立謝偉俊、六人組謝偉銓、工聯會麥美娟及自由黨張宇人，反而民建聯就冇代表加入。

唔信佢會守保密協議

如果呢個名單成為最後名單，主席一職將會落入建制派手中，而主席按慣例唔投票，調查委員會嘅調查結果勢必平手，所以建制派為保主導權，一定只能夠畀兩名民主派代表加入調查委員會。據了解，民建聯張國鈞已於截止限期前向秘書處交提名表，意味下周五最少有八名議員爭七個位，而率先被拒諸門外嘅就係毛婆。

多名建制派議員表明唔能夠畀毛婆加入調查委員會，認為毛婆只為搞事、不講理性，而且唔相信佢會遵守保密協議，更有建制派直言唔使開會都可以有共識要率先踢走毛婆！其實毛婆相對梁繼昌及郭榮鏗明顯少咗專業背景，殺傷力理論上較細，但有建制派講明唔怕識嘢嘅對手，最怕會搞事嘅人，仲話毛婆最惹人反感喎。

謝偉俊係捱義氣加入

至於謝偉俊一向就「峯搶手機」事件相對低調，但最終都接受提名成為調查委員會成員候選人。佢就話估計民主派會有兩名具法律背景議員加入，所以建制派方面都有需要加強法律背景作平衡，而佢都係最後一分鐘先決定加入，仲話係捱義氣咁話。

峯鴿因為「峯搶手機」而遭議員提出譴責動議，立法會須成立調查委員會調查事件，當完成調查後，就會將報告交畀大會表決，只要獲得在席三分二議員贊成就能夠通過罷免峯鴿。