中環出更：拗拆高球場 葉劉肉緊鬧爆
粉嶺高爾夫球場地契於二○二○年到期，有意見要求政府收回球場起公屋，立法會議員尹兆堅（肥尹）都支持。不過本身係該球場會員嘅立法會議員葉劉淑儀，尋日就喺立法會點名鬧爆肥尹，話佢未解決好北區交通運輸問題前「講咩拆人球會！」而肥尹就質疑身為會員嘅葉劉「肉緊過頭」。
立法會財務委員會尋日討論元朗錦田南發展計劃前期工程，以配合錦田南嘅房屋發展計劃。肥尹話錦上路一帶道路比較窄、政府應先解決交通問題，避免市民入伙後怨聲載道。
講完先申報自己係會員
此時葉劉就出聲喇，話肥尹想拆高爾夫球場嘅同時「知唔知隔籬粉錦公路幾窄？知唔知球會對面就係北區醫院？」而佢一輪嘴講完，先申報自己係粉嶺高爾夫球場會員。
尹兆堅其後就質疑葉劉「肉緊過頭」，都未了解清楚佢嘅原則，重申政府應該喺任何發展區都要先解決交通問題。佢之後又揶揄葉劉，話葉劉講過反對高地價政策，希望葉劉處理粉嶺高爾夫球場時立場一樣，又或者將粉嶺高爾夫球場用地讓出，到另一球會打波咁話。
卓妮