中環出更：聽母話潔身自愛 李周美枝做乜都得
香港小朋友被指為甚少親親大自然，平日甚至小小苦楚都受唔住。早前有個去內蒙古嘅大學生暑期實習計劃舉辦啟動禮，在場嘅香港女童軍總會香港總監李周美枝諗起自己十六歲嘅時候，畀屋企人送去美國讀書，當時媽媽只係交代一句：「潔身自愛」，其餘想做乜嘢都可以去做。佢直言自此就無論想做乜嘢，都冇人阻到佢咁話。
李周美枝又話，之前都帶過女童軍去內蒙古交流，點知個個都顧住睇日出同星星，唔願瞓覺，有啲成員頭幾日就好唔願起身，好彩之後識得自律，先至好啲咋。同場嘅醫療輔助隊少年團副總監梁永鏗都話，參加得制服團體嘅年輕人多數都唔係「港孩」，佢都成日帶團「上山下海」去交流。佢認為年輕人唔應該成日喺屋企打機，又鼓勵年輕人要多啲付出同學習紀律。佢仲話佢啲仔女細個都係少年團成員，依家大咗都仲會一齊行山周圍去。
莊家彬唔會做虎爸
香港菁英會主席莊家彬就話，佢幾兄弟姊妹關係融洽。原來佢哋細個每星期都會跟爸爸莊紹綏一齊出海過夜，佢仲講笑話自己係喺海度長大，所以有次去印尼上船，全部人都暈船浪，得佢一個人無事咁話。莊家彬又話將來唔會做「虎爸」，希望小朋友喺親近大自然同兼顧學業之間攞到平衡。
活動主辦單位香港青年動力基金主席吳傑莊話，已經連續五年安排年輕人去內蒙古實習，第一年有七千幾人爭五十個位，有啲學生同當地老闆建立咗好深厚嘅感情，臨走前都攬住一齊喊，覺得好感動。佢仲話，每年七月係內蒙古最靚嘅時候，啲草生得高，喺一望無際嘅草原下就會覺得自己原來好渺小喎。
卓妮