政情：排隊發言撳錯掣 鄭泳舜問得唔得

尋日嘅立法會會議有六條口頭質詢，每條口頭質詢會有廿二分鐘，而當第一條口頭質詢去到二十分鐘時，就輪到鄭泳舜發言，點知會議廳出現冷場，其後佢就有啲尷尬咁話唔好意思，解釋話撳錯掣，仲問主席得唔得喎，之後就迅速輪去下一個撳咗掣嘅議員發言。

第二條質詢順利發問

其實，過往立法會都出現鬥快撳掣發言嘅情況，希望把握僧多粥少嘅發言機會，不過鄭泳舜就話自己唔係反應太快，只係見第一條質詢已經去到近二十分鐘，諗住撳定掣排隊為下一條口頭質詢發言，好彩去到第二條質詢時都順利問到啫。佢仲話雖然進入立法會時間唔係太耐，但都開始熟悉《議事規則》嘞！