曾經有人講過如果要成功，必須起碼捨棄一樣自己最愛嘅嘢，先至可以達到心目中嘅目標，而呢個道理套用喺徐有真身上就最適合不過，事關呢位憑住純情氣質，加上玲瓏浮凸身材，而迷倒唔少男士嘅南韓模特兒，為咗能夠喺事業上獲得成績，便捨棄咗佢嘅夢想。
平淡生活同模特兒工作係咪相對嘅呢？對某啲人嚟講未必係相對，只係對徐有真嚟講卻係魚與熊掌嘅問題。徐有真一直都希望能夠過住平淡嘅生活，但係佢深明必先要解決經濟問題，所以佢一直苦思點樣可以令未來生活有保障，咁啱有一位從事模特兒工作嘅同學，問佢有冇興趣兼職做模特兒，佢無多想便答應，皆因工作時間彈性又可以增加見識，最重要係唔影響到學業。徐有真去到模特兒事務所面試時，對方認為佢擁有清純嘅氣質及標致嘅面孔，加上一副火辣身材，絕對有條件走紅，故此好快就安排工作畀佢。事實證明模特兒事務所相當有眼光，皆因徐有真獲得唔少攝影師嘅好評，人氣亦火速上升，於是事務所便游說佢轉做職業模特兒，並保證工作上嘅安排唔會影響到佢嘅學業。眼見合作得唔錯，同時又適應咗模特兒嘅工作，於是有真好快就答應對方，2007年以職業模特兒身份出道，先後喺多本潮流、汽車、男士等雜誌上亮相，隨住知名度愈嚟愈高，事務所安排有真以車模身份喺大邱舉行嘅車展上登場，性感嘅造型令人一見難忘嘅外形，成為車展上亮眼嘅焦點。
經過呢次大型車展演出成功後，令徐有真充滿自信心，之後佢同唔少車模一樣，以賽車女郎身份喺賽事中亮相，呢次演出可以話係佢嘅轉捩點，事關化身性感賽車女郎嘅佢，一改以往純情嘅造型，以野性美女形象示人，結果獲得極佳嘅評價，自此以後佢實行攝影模特兒、車模及賽車女郎三線同時發展。本嚟已經擁有極高人氣嘅有真為咗可以令人氣提升到更高層次，2009年佢參加超級賽車女郎大賽，憑住豐富嘅模特兒工作經驗，加上能言善道及堅強嘅個性，結果喺比賽中獲得最佳賽車女郎嘅殊榮，人氣攀至頂峰。不過辛勤嘅背後，有真卻發現自己嘅身體支持唔住，於是放咗3個月大假，希望能夠令身體獲得充分休息。大假過後，有真以為已經回復最佳狀態，卻發現原來自己已經唔再能夠應付到大量嘅工作，於是佢減少車模及賽車女郎嘅工作，集中做攝影模特兒。呢個時候佢諗起當初之所以從事模特兒工作，目的就係為咗搵多啲錢，希望將來生活有保障，可以過平淡生活，而眼見未來嘅日子，似乎已經遠離當初自己嘅夢想，最後佢決定只專心做攝影模特兒，雖然工作量大幅減少，但仍獲得粉絲嘅支持，相信對佢嚟講已值得安慰。
簡介：徐有真嘅純情魅力固然吸引，但係對唔少男士嚟講，其標致嘅面孔及玲瓏浮凸嘅身材，先至係佢最大嘅魅力所在，不過佢一直無刻意展現自己嘅身材，反而希望大家能夠欣賞佢嘅內在美。如果大家想了解佢多啲，就要Click入呢個網站喇！
網址：http://cafe.daum.net/youjinRacingModel
出生地：首爾
身高：170cm
三圍：33-22-33
撰文：魂