政情：保育衙前圍村 嫻姐實地考察
市建局早前公布喺衙前圍村嘅重建項目中，發現咗唔同保存程度嘅圍牆、更樓等石製地基，估計最早建築時期為明清兩代。工聯會立法會議員何啟明、身兼市建局非執行董事麥美娟尋日約見市建局執行董事（商務）馬昭智到現場視察，而工聯會立法會前議員陳婉嫻（嫻姐）都在場。老實講，喺多年前話要清拆衙前圍村時，嫻姐已經瞓身幫班村民，依家連保育都跟到足，可見佢好上心。
倡配合啟德發展 連結附近古蹟
喺實地考察後，何啟明話雖有水漬、碎石，但整個地基結構完整，希望市建局可以繼續發掘及有更多新發現。佢仲話衙前圍村作為九龍城最後一條圍村，市建局可喺完成發掘後，研究點樣保育衙前圍村，又指衙前圍村附近有一個歷史群，如九龍城寨、宋王臺、天后廟等，希望可以連結起來一起保育及教育，配合啟德發展，清楚向香港人展示宋代至清代的歷史。
此外，工聯會未來會相約學者到現場考察，制訂民間的保育方案予政府及市建局參考。