政情：環境局被封頭號敵人 黃錦星搵副手受靶

議員陳克勤尋日喺立法會提出質詢，指有五間大型連鎖快餐店喺一六年時共派發逾四億件即棄塑膠餐具，問政府會唔會鼓勵快餐店減少使用甚至停用即棄餐具。謝展寰回應話本港嘅家居廢物雖然稍為下降，但係因為工商廢物增加，所以廢物產生量仍有上升趨勢，對於附送用完即棄嘅塑膠餐具，佢就話會計劃研究管制。

管制即棄餐具只識立法

聽完謝展寰咁講，陳克勤就同政府計數，話由今年做研究開始，到有條例草案出台，預計要「大大大後年」先上立法會首讀，鬧爆政府要花三五七年先可以立到法。佢仲舉咗唔同例子，話有食店以財政誘因去令市民減少用即棄餐具，叫政府參考。

之後Tommy就寸爆謝展寰，話「畀多個答案你（環境局）可以自圓其說」，指因為冇人洗碗同筷子，所以令到工商廢物增加。佢仲話同緊幾個大型快餐店傾緊點樣減少用即棄餐具，希望政府唔好「口爽荷包立」，唔好淨係做立法。

張宇人斥欠缺財政誘因

佢又話𥄫住環境局好多年，環境局係佢嘅「頭號敵人」，批評當局多年嚟只係「拎支棍毆落去」，乜嘢都冇做。佢仲希望政府唔好淨係做立法，要增加財政誘因，令市民減少使用即棄餐具。

泛民都唔執輸鬧埋一份，民主黨（白鴿黨）許智峯就話政府唔立法規管即棄餐具，就係海洋生物嘅「頭號敵人」，仲話每三隻海龜就會有一隻食到塑膠，如果政府再唔立法就係對唔住大自然。

畀班議員狂轟，謝展寰就話要推動減少即棄餐具，需要考慮好多因素，包括香港嘅具體情況。佢仲話會同餐廳業界合作，希望可就推出自願性運動方面再作進一步探討。

其實應該由局長黃錦星去立法會回應議員質詢，但黃錦星放咗假，由謝展寰頂更，點知畀班議員鬧爆，代黃錦星受靶添！