中環出更：狙擊天價橋 朱凱廸離晒題
被批評係「天價橋」嘅元朗連接西鐵朗屏站至教育路以南嘅高架行人天橋，涉款逾十七億元，多個政黨早前批評天橋造價過高。有議員尋日喺立法會大會上就行人專用區同行人街道等方面，向運輸及房屋局提出質詢時，議員朱凱廸乘機批評元朗天價橋製造熱島效應，卻被代主席李慧琼指佢離題。
原本傾緊行人專用區
朱凱廸話路政署沿元朗明渠興建行人天橋，相關明渠係好重要嘅通風廊同景觀廊。佢批評元朗天價橋能夠做到行人快速暢通嘅效果，但同時就破壞通風系統同製造熱島效應，希望政府重新考慮建築師學會提出嘅方案，避免再做只有一樣好處而帶來負面設計嘅方案。
運輸及房屋局局長陳帆回應時指元朗天價橋係考慮當區居民意見，同埋當局嘅交通配套安排，確保道路安全，又話有關討論已經喺事務委員會上討論，天價橋配合現行政策，鼓勵市民多步行，認為能回應市民訴求。
卓妮