中環出更：預防長者腦退化周潔芯提倡玩具
玩具除咗係小朋友嘅恩物，原來亦都係預防腦退化嘅妙品。國際獅子總會中國港澳303區尋日舉行優質社會服務計劃頒獎禮，其中一個獲獎嘅服務計劃，係透過玩具遊戲嚟強化長者嘅認知訓練。主事人、香港路德會社會服務處助理服務總監周潔芯話，有一位生活形同隱蔽長者嘅寡婦愛上同邏輯有關嘅玩具之後，不但變得樂觀開朗，亦連帶邏輯思考都強化咗，後生仔亦不時要向呢位老友記多多請教。
本業係遊戲治療師嘅周潔芯話市面上常見嘅小朋友玩具，未必合乎老友記嘅需要，於是佢就會搵義工幫手，將一啲玩具改裝，譬如放大尺寸同增強觸感，同埋又以茶樓點心為題材嚟設計嘅記憶遊戲玩具，務求老友記可以玩得全情投入，而一啲復古嘅玩具，譬如以一條繩來連結兩個穿孔汽水蓋，名為「拉哨」嘅玩具，往往最能夠勾起老友記嘅童年回憶。由於製作長者玩具嘅款式同數量都頗為可觀，周潔芯認為要持續推廣，成立社企就係一個長遠目標。對於國際獅子總會中國港澳303區第四分會主席兼大會主席陳中正都話，長者玩具值得提倡。
甄韋喬睇好安老產品
世界傑青甄韋喬認為世界邁向老齡化，老友記嘅需要實在不容忽視。佢話早前參觀一間護老院，設施同服務雖好，但高達五萬五千元嘅月費唔係人人都可以負擔，所以將來居家安老必成主流，而各種與此相關嘅產品亦會大行其道。
至於應屆傑青鄧智傑，佢服務嘅信義會社會服務部就憑小記者計劃而得獎。面對無可避免嘅社會老齡化，佢話小記者計劃過往都有探討，然而今次就係因環保嘅議題，從而觸動到社署選擇以環保飲管嚟做紀念品，令佢同一眾小記者都大受鼓舞。
卓妮