政情:當選律師會會長 彭韻僖唔敢答敏感問題

香港律師會喺上月底舉行周年大會同理事會改選,新一屆理事會尋日首次召開會議,現任副會長彭韻僖當選為新一屆會長,成為律師會成立一百一十一年以來首位女會長,不過被問及點睇本土民主前線前成員梁天琦被判囚、《公安條例》係咪界定模糊等多個敏感議題時,彭韻僖合共五次表示不作評論。唔知佢係因為啱啱做會長未熱身,定係因為太錫身、乜都唔敢答呢?

咩都「唔評論」 如錄音機

彭韻僖尋日會後被問及多個敏感議題,其中之一就係點睇旺暴案梁天琦被判囚。彭韻僖就話,佢對司法機構有信心,而被告可能上訴,故不宜作評論。之後彭韻僖又被問及《公安條例》及高鐵一地兩檢係咪衝擊香港法治,同埋有指社會美化年輕人抗爭等敏感問題,彭韻僖都係話「暫不評論」、「冇特別評論」同「唔評論」,成個人肉錄音機咁。就算問到律師會未來有乜嘢挑戰,同埋會唔會為政治議題發聲,佢都只係回應要內部再商討,答咗都好似冇答咁。

至於該會副會長方面,彭韻僖就話會上通過動議,副會長人數將由目前兩名增至三名,將於兩周後再開會時舉行選舉喎。

第一手消息請下載on.cc東網iPhone/iPad/Android/Windows Phone Apps