中環出更：大數政府不是 劉業強：或激烈行動抗爭
新界鄉議局主席劉業強一向形象斯文，甚少發火鬧人。不過喺前日嘅鄉議局執委會上，佢就少有地大數政府嘅不是，更警告政府唔正視問題，唔排除會有激烈嘅抗爭行動喎，到底因咩事咁火呢？
不滿損害原居民權益
劉業強喺會上批評政府一直以溫水煮蛙方式損害原居民權益，令到佢哋去到忍無可忍嘅地步，好似政府就申請興建丁屋單方面增加條款，搞到有原居民誤墮法網，而喺丁權司法覆核案中，政府嘅態度就愛理不理，由原居民自生自滅咁話。
除咗丁屋同丁權之外，劉業強又批評政府土地政策傾向環保人士，仲有僭建、差餉豁免等等問題惹起原居民關注。數極都有，難怪佢少有地會咁㷫喇！
鄉議局就確認喺下月廿三日舉行「力爭公義‧自強不息」嘅申訴大會，希望借活動展示新界人團結同力量。劉業強就話希望到時可以逼爆鄉議局，而當日更撞啱大暑，正適合(興興)地嘅原居民發洩咁話。
卓妮