國家領導人不斷強調，反腐永遠在路上，而且要做到冇禁區、全覆蓋兼零容忍。冇錯喇，內地嗰班貪腐「裸官」就算匿到天腳底，中央都有本事緝拿歸案，反腐既然「雖遠必誅」，又點可以容忍香港成為「燈下黑」！
呢嗱，國務委員、公安部部長趙克志尋日喺北京會見到訪嘅香港廉政專員白韞六時就開到聲，話希望廉署同內地執法部門進一步加強交流合作，依法打擊跨境經濟貪腐犯罪，共同履行好維護公平正義，懲治違法犯罪，維護國家安全嘅職責使命咁話。
正所謂聽鑼聽聲，聽話聽音，京官講咗一大堆，你話係「期許」又得，你話係「柯打」亦得。須知國務委員分屬國家領導人，趙克志早排親自南下深圳，督師粵港澳三方掃黑除惡聯合行動，香港警方不敢怠慢，積極「交數」，連日來破獲唔少涉黑案件。家陣「大孖沙」一聲令下，睇怕中港兩地嘅貪官污吏應該有得震冇得瞓。
有本港政界人士就講得啱嘞，反貪沒有禁區，莫講話台上嘅貪官唔可以放過，退休官員貪污罪行以至所得贓款，亦必須一查到底，否則貪官提早退休就可以「軟着陸」，即係變相擁有特權。
之不過講就咁講啫，依家內地同香港尚未簽訂司法互助協議，要拍打中港兩邊走嘅老虎烏蠅，唔係話咁易。例如有內地貪官帶同贓款來港，除非到埗後涉及洗黑錢行為，本港警方可以跟進調查，否則廉署好難介入；同樣道理，港產貪官帶同贓款逃匿內地，如果廉記冇充分證據顯示貪污罪行喺本港進行及策劃，亦係冇符。年前汕尾當局清除三十多名裸官，當中好多擁有香港永久居民身份證；本港某五星級酒店係內地貪官嘅窩點，亦係公開秘密，有人形容香港唔單止係貿易自由港，更加係內地貪官嘅自由港，真係一啲都冇誇張。
功夫茶真係諗極都唔明，香港回歸二十年，喺一國底下同內地簽訂司法互助協議，何難之有？講真，就算有冇制度都好，阿爺都唔會容許腐敗分子喺眼皮底下逍遙法外打橫行，與其三日唔埋兩日爆出「強力部門越境執法」、「自行北上協助調查」嘅爭議，倒不如一切攤在陽光下，依法辦事。再講吖，做人最緊要過得自己過得人，刑事犯着草內地被引渡返港嘅例子不勝枚舉，反觀中港兩地反貪機構透過個案協查計劃，相互向證人取證，內地就年年錄得「逆差」，點講都講唔通啫，吓話？
始終都係嗰句︰掃黑除惡只有一國，犁庭掃穴不容兩制。港產官僚懶懶閒唔郁手，唔係又要等阿爺幫你掃場吖嘛！