政情：王丹美國成立智庫 黃之鋒官司纏身甩底
由八九學運領袖王丹牽頭成立嘅智庫「對話中國」，將於「六四」廿九周年、即明日喺美國華盛頓舉行成立典禮。早前已經公布過香港眾志秘書長黃之鋒都係智庫理事會理事之一，但尚有官司纏身嘅黃之鋒因為正保釋等候上訴，其護照亦被扣起，未能離港，所以佢將會甩底，去唔到美國出席典禮喇。
眾志常委代出席發言
智庫理事會由十五人組成，兼任智庫所長嘅王丹亦係理事，其他理事包括黃之鋒、台灣太陽花反服貿學運領袖林飛帆等。八九學運領袖吾爾開希就係佢哋嘅顧問委員會委員之一。今次黃之鋒去唔到美國，香港眾志常委敖卓軒就會代替佢出席，兼且仲會喺成立典禮上發言添。
黃之鋒因一四年「佔旺」期間，涉違反法庭禁制令，被控刑事藐視法庭罪，法庭最後裁定黃之鋒罪名成立，判監三個月。黃之鋒之前向法庭申請保釋等候上訴，並獲法庭批准以一萬元保釋，但要居於報住地址，唔准離開香港同每個月都要去警署報到。