講起旺角行人專用區，好多人可能即刻唉聲嘆氣，事關噪音實在擾民，加埋一班大媽亂唱亂跳，真係冇幾多人頂得順。不過自從油尖旺區議會通過殺街動議，連有誠意嘅街頭表演者都被趕絕，對香港呢個文化沙漠嚟講，未必係好事嘅咋。
嗱，有政黨計劃聽日喺旺角行人專用區劃出三個表演區，示範可行嘅街頭表演規管形式，將音樂表演者安置喺兩邊，中間就由非音樂表演者隔開，仲禁止使用重型喇叭，兼夾限制每節只可以表演一粒鐘，聲浪唔超過八十五分貝，睇吓可唔可以減輕噪音問題，長遠希望政府發牌規管喎。
講真，呢啲建議唔係唔可行，問題係邊個執行監管，如果單靠表演者自律，同依家冇乜分別，即係嘥氣。專用區之所以被批評為「烏煙瘴氣」、「神憎鬼厭」，港府將外國經驗生搬硬套，整咗個步行街出嚟就關人個關，固然係罪魁禍首，之但係部分表演者唔自律，大家一味擘大喉嚨、開行喇叭鬥大聲，搞到街坊怨聲載道，同樣難辭其咎。所以話，政黨呢個建議成效係點，真係好難唔令人質疑。
講到底，專用區最擾民嘅地方就係噪音問題，噪音元兇就係嗰啲收取觀眾打賞、爭崩頭嘅街頭表演者，「殺街」斷咗佢哋米路，難怪佢哋反應最大，又要抗議又要生要死咁。但正如錢幣有正反兩面，一刀切殺街係就係可以杜絕噪音，弊在隨時殺錯良民，連真正有水準嘅街頭表演者都冇地方一展所長。學影壇大哥話齋，中國人係要管嘅，劃定表演範圍嘅安排如果冇監冇管，時間一耐必然荒腔走板，形同虛設。到底點樣先可以平衡各方訴求，既做到唔擾民，又做到有街頭文化特色，真係好需要港府從長計議o架。
話時話，港產官僚成日話要推動文化創意產業，專用區本來都有好多唔同特色嘅街頭藝人，你玩雜耍，佢表演「的波」咁，唔只百花齊放，仲同附近居民商戶相處融洽，之不過後來劣幣驅逐良幣，愈來愈多五音不全嘅大媽大叔進駐，結果令人耳根受罪。無王管咯喎，梗係亂象叢生喇，政黨建議推出發牌制，攞正牌先可以喺街頭表演，唔係冇得諗o架，爭在港府肯唔肯做呢一步啫。呢，近排有唔少街頭藝人喺鬧市「Busking」，畀人拍片放上網而爆紅，呢啲咪係賞心悅目嘅街頭文化囉。
一句到尾，旺角行人專用區呢個爛攤子係政府十八年來卸責所造成，依家就係睇佢點樣出手撥亂反正，係有心定齋講推動文化創意產業，就係睇政府呢鋪點作為嘞。