政情：膽固醇未超標 唐卓敏食定藥打底
有病要食藥，道理好易明，不過膽固醇冇超標就食住藥先，係咩玩法？亞洲核醫學及診斷學專家唐卓敏（William）就係咁喇。佢話好多年前已開始食低劑量嘅降膽固醇藥，事關有關嘅數值標準係好耐之前訂立嘅，依家人類壽命愈嚟愈長，如果想老咗都仲活得健康，就要自降標準，盡量將膽固醇控制得再低啲喎。
美食當前唔使忍
呢個講法都幾好玩，事關膽固醇係導致心血管疾病嘅元兇，唔止人體會自己合成製造，仲會喺飲食中攝取。好多美食都伴隨住高膽固醇，經常令關注健康嘅人卻步。William食咗藥打好個底，美食當前就唔使就住、就住，咁就可以盡情享受人生喇。
William咁有先見之明，斷估佢太太林青（Erica）應該都會跟住食藥啩？點知Erica笑笑口話冇，因為佢嘅家族史一向係膽固醇偏低，所以冇呢個煩惱喎，真係幸福。