政情：忽然貼地「搞民生先」 泛民護短為峯鴿開脫
民主黨立法會議員許智峯（峯鴿）強搶保安局女行政主任手機，有議員提出譴責動議並將交付調查委員會處理。尋日立法會內務委員會會議討論研究政策事宜嘅小組委員會次序，多名泛民議員借題發揮，話研究政策事宜則貼近民生，應該比調查委員會優先處理。泛民擺明護短，為峯鴿開脫。
過去有共識調查先行
內會上多位民主派議員為峯鴿護航，其中資訊科技界莫乃光話，調查委員會用嘅人手同資源較多，今屆立法會任期過咗將近一半，但好多項目嘅進度令人擔心，認為民生事宜應該行先，搞掂咗民生先再進行調查。議員郭家麒就批評，調查委員會只為政治打壓，相信研究政策對市民重要得多，故此議員要做好民生工作，而非將問題無限放大喎。唔知建制派被調查時，佢哋又係咪咁講呢﹖
最後，內會主席李慧琼就話過去嘅共識係調查委員會先行，且調查委員會嘅調查涉及議員資格，係有憲制責任嘅。最終內會都係通過研究政策事宜小組委員會展開工作嘅時序。