政情：傳退黨另起爐灶 馮檢基唔回應
三月立法會九龍西補選，建制派深水埗區議員鄭泳舜擊敗前建築界議員姚松炎當選，而姚松炎與泛民初選未能出線兼「被屈基」逼退嘅民協馮檢基（阿基），雙雙成為輸家，而事隔不足三個月，有傳阿基會退出民協，疑另起爐灶成立民間組織。阿基接受查詢時話，對於流傳嘅事唔作回應。
據指計劃出書 力數泛民
於政壇打滾三十多年、民協創黨成員阿基此時傳出可能有新動向，認真耐人尋味，首先據報阿基計劃今年內出自傳，有傳內容關於阿基多年嚟對泛民嘅不滿，真係信不信由你。
其次，因宣誓無效被取消立法會議員資格（DQ）嘅自決派劉小麗，近日才宣布撤回DQ案上訴，意味政府要重啟九龍西議席嘅補選，而劉小麗欽點嘅後備人選又冇民協份，究竟係咪有人心思思想鋪路「復出」，大家就要拭目以待嘞！