政情：挺身為馬逢國護髮 黃國健倒米揭瘡疤

髮Gel風波搞到杰撻撻，多名民主派議員就借機抽水，好似提出休會辯論嘅譚文豪，雖然佢冇點名針對馬逢國，仲直言對事不對人，強調冇人可以為方便去濫權、規矩就係規矩，但佢發言一開首就問及「法治重要定髮Gel重要」，當講到法治變到脆弱時，有民主派議員就抽水話「髮線脆弱」，根本係人身攻擊。

議員林卓廷發言時都提及髮型、髮膠等字詞，擺明意有所指。佢仲明言法治、髮型、髮膠都需要捍衞，但為咗捍衞髮膠而摧毀制度就唔能夠接受，認為所有人行使權力同身份都要小心喎。見到建制自己友被人身攻擊，黃國健都忍唔住反擊，但效果反而再揭馬逢國瘡疤，仲搞到其他建制派議員都忍唔住爆笑添！

將議會焦點轉回頭髮上

黃國健強調無需要進行休會辯論，因為立法會有太多事務需要去討論，提出休會辯論只係抽水動作啫。佢更幫口話馬逢國今次事件冇咩咁大件事，但最幫倒忙就係，話馬逢國最錯嘅可能係「頭髮咁嘅量，竟然仲要堅持帶髮Gel，係冇乜必要」囉，將議會嘅焦點又帶到去馬逢國稀疏嘅頭髮上。

馬逢國在討論中處於捱打狀態，但佢就再次向公眾及涉事人員致歉，直言事件緣於誤解，而佢亦指當日同機場保安員爭論過程提及議員身份同機管局高層名字都唔恰當，但強調無要求對方給予特殊對待。佢又話，當知道機管局對事件作出調查後感到極度不安，已第一時間去信機管局解釋，希望機管局盡量唔好處分涉事嘅幾位保安員。最終休會辯論被否決，相信馬逢國可以鬆一口氣。

其實黃國健都係一心想幫馬逢國，可惜口直心快開口夾着脷。話時話，黃國健已到咗合乎拎長者卡嘅年齡，頭髮仲咁濃密，難怪佢體會唔到髮線後移、脫髮嘅苦況嘞。