中環出更：不滿梁耀忠 5執委退出街工
立法會議員梁耀忠（阿忠）領導嘅街坊工友服務處（街工）大地震，包括執委會主席陳裕詩等五名執委，尋日向街工全體會員發信決定辭任執委，並集體退出街工，理由係不滿街工勞工組疑被解散。信中批評，「權力者利用街工的存亡作為籌碼，制度已難以作為約束制衡的工具」，表明難以繼續參與「只能作為梁耀忠啦啦隊的執委會」，故選擇辭職。阿忠回應，佢哋作為執委應該清楚成件事，對佢哋偏信勞工組感到遺憾。
指鋪路選舉 勞工組疑被解散
街工五名執委陳裕詩、江健成、羅維進、龍子維及朱江瑋向會員發信，爆出勞工組由三月至今疑被解散嘅經過，信中引述阿忠稱，起初原因係為咗預備下屆立法會選舉，要招聘兩位協助選舉嘅職員，故希望收回勞工組一切開支；至四月上旬，佢哋話阿忠決定停止支付勞工組開支嘅原因已改為街工財赤。
信中又提及四月底會員大會上，阿忠聲稱因為街工財赤，五月底就唔會承擔勞工組支出，要求會員共同承擔，而受財赤影響嘅有五名職員，包括勞工組三人。信中提及指，由於繼續堅持會導致街工職員無法出糧，五人迫不得已決定離開街工。
阿忠就話，如果佢哋唔信街工財赤，亦難以令佢哋相信，但話事件係因為選舉鋪路，佢就覺得唔公道，因依家講選舉係言之尚早喎。
卓妮