中環出更：藍王雲仙難捱高溫 着絲質裙抗熱浪
本港史上最熱嘅五月啱啱過去，高溫日子點捱好呢？早前卓妮喺善德基金會宴會上，見基金會常務副主席藍國慶太太、博愛醫院總理藍王雲仙（Mina）着住一件藍色絲質連身裙，佢大呻話，天氣熱到幾乎唔敢出門，感覺一出街就會中暑。依家要特登揀透氣通爽嘅絲質料着，出街仲要記得戴帽，搞到成個人嘅造型都要改變晒咁話！
Mina講起酷熱天氣特別有感受，佢話屋企同公司都喺大埔，該區前幾日高溫直逼攝氏三十八度，真係熱到冇晒心機。Mina仲戥屋企兩隻狗狗可憐，因為狗狗熱到全日伸出條脷散熱，又冇得出去，怕一出去就會中暑，好彩兩隻都係細狗，都可以喺屋企花園跑吓當運動。
董中浩推介開胃美食
大熱天時，胃口都差啲。基金會主席董吳玲玲嘅老公董中浩對煮嘢食素有研究，唔知有冇咩開胃美食推介呢？董中浩就話，可以試吓用海參及木耳加些少果醋、麻油及鹽，雪藏後當涼拌小菜食，健康又開胃。
基金會永遠名譽會長鄭穩偉、許蔚萱同葉鍾佩雲老公葉俊亨等人都有到場，呢一晚係慶祝多位善德人各有不同嘅喜事，有人政途發展順利，有人榮升馬主，亦有人升呢做爺爺。董吳玲玲特別介紹八十後嘅新總理葉嘉威畀卓妮識。葉嘉威現時幫政府喺全港搞緊二千幾個WiFi熱點，係科技專才。董太形容葉嘉威係基金會嘅生力軍，將來會借重佢喺科技上嘅專長，為基金會開拓利用唔同媒體進行籌款或宣傳，但詳情就要賣吓關子先喇。
卓妮