【本報訊】夫婦提出分開要技巧，專家籲尋專業協助。註冊輔導心理學家萬家輝博士認為，男事主過往有類似前科，兩次的處理手法都相近，反映事主情緒管理較差，為人較衝動，面對挫敗時唯一反應是用暴力解決，因此相信「佢平時都係咁」，而其妻子亦應知道丈夫性格，萬形容「佢處理同提出嘅時候可以再做好啲」。他又提到，「講起呢啲問題，男方一定覺得被背叛」，女方可以分階段「畀啲預兆，等佢有心理準備」，或婉轉表示「大家唔夾」，逐步透露想離開，以免觸動情緒管理差的人。
萬博士又指出，其實當其中一方提出分開的建議時，應留意以下幾點，避免出現更激烈的爭執。首先，當「明知佢想『爆』嘅時候，大家可以分開一陣」，例如落街抖抖氣、或身處不同房間沉澱一下，需知道「吵架時一句無心嘅說話，都可以成為助燃劑」。第二，女方可以將事件告知部分與丈夫的共同親友，「唔係唱通街，但多個人知，幫吓口其實可以幫件事降溫」。第三是要視乎情況開口，切忌在對方飲完酒、食完藥或收工「超攰」時開口，免令對方更加暴躁。最後，平日得悉另一半有情緒問題時，應尋求專業人士協助，例如家庭治療師、心理學家、輔導員等，以便作出協調。
另外，有街坊指出涉事夫婦遷入涉事單位僅一年，單位內不時傳出爭吵聲，亦有人指事發時聽到有人大嗌，隨即揭發這宗悲劇，對事件感到十分難過。