香港地乜都有得炒，就連康文署康體場地都大炒特炒，炒場黨仲發展到集團式經營，唔到你唔服。嗱，康文署尋日公布兩項新措施打擊炒場活動，有冇成效仲要睇過至知，不過你有張良計，佢有過牆梯，最怕治標唔治本咋。
康文署係咁講嘅，本月二十日起，市民必須親身並出示身份證到櫃位預訂署方收費康體設施，唔可以再以他人身份證副本訂場，同時推行「草地足球場抽籤」試驗計劃，先分配段節供抽籤預訂，剩餘嘅節數喺限期後會以先到先得方式供市民預訂，話咁做可以增加公平性同打擊炒風喎。
康文署將新措施講到天花亂墜，但真正用家就唔多睇好嘞。有經常租用草地球場嘅教練話喎，親身預訂又好，網上預約都好，根本唔夠炒場黨爭，因為佢哋已經發展到好專業，仲會經社交媒體及通訊軟件放售「場紙」，而且會親自到場簽場，之後先至將場地交畀客人使用，簡直係滴水不漏。
早知今日，何必當初吖。炒場問題早就唔係新聞嘞，炒場黨覷準一般市民冇咁多時間排隊訂場，於是大量招聘人手排隊霸位，好似足球場，原本只需二、三百蚊嘅場租，往往炒高三、四倍轉讓，無本生利，豬籠入水。即使網上訂場一樣唔好得幾多，事關電腦系統慢夾渣，費時失事。正所謂禁微者易，救末者難，康文署咁多年來唔嗲唔吊，放任自流，家陣炒場黨已經集團化、系統化，積重難返，要對付就唔容易喇。
再講吖，康文署職員敷衍塞責亦助長炒場歪風。本報舊年已經踢爆，雖然簽場處有告示標明租場人士必須出示「場紙」同埋身份證正本，但租場人士冇遵守不特止，仲求其喺登記冊撩隻龜就算，署方職員隻眼開隻眼閉，睇都唔睇就放行，變相成為炒家嘅幫手，有乜法子唔亂象叢生吖。
真係諗極唔明，今時今日科技先進，唔通真係冇辦法解決炒場問題咩？炒黃牛係全世界都有嘅亂象，好多地方早就推出實名登記及嚴格審查，點解港府唔實行拿來主義呢？何況《公眾娛樂場所條例》並不適用於政府場地，就算炒黃牛斷正，頂多罰款二千蚊咁大把，相比炒場利潤係蚊髀同牛髀，完全冇阻嚇力。犯法低成本甚至冇成本咯喎，試問炒場黨又點可能放棄呢舊肥豬肉呀？
講到尾，只要精神不滑坡，辦法總比困難多。炒場活動已嚴重影響市民利益，嚴打係應有之義，爭在港府有冇決心啫。林鄭話會研究炒黃牛刑事化，同埋將《公眾娛樂場所條例》覆蓋埋政府場地，咁就講多無謂，行動最實際吖。