政情：「立會關正傑」領唱《萬水千山縱橫》
立法會久唔久都會開音樂會，畀班議員輕鬆吓，而嚟緊嗰場就喺七月十三日，即係今個立法年度嘅最後一場。今次音樂會除咗有工程界議員盧偉國呢位常客，吹色士風獨奏《江河水》外，仲有立法會秘書長陳維安化身成實力派歌手關正傑，領唱名曲《萬水千山縱橫》，同場仲有教育界議員葉建源、醫學界議員陳沛然合奏，陣容咁鼎盛相信會係當日嘅高潮位喇！
陳沛然跟女學敲擊樂
講起合奏，以前葉建源試過喺音樂會上打鼓，而今次陳沛然都講明會玩敲擊樂，事關佢兩個女都喺學校嘅樂團入面玩敲擊樂，屋企買咗各種敲擊樂器，所以陳沛然都索性跟個女學，仲話自己依家叫做識少少咁啦，亦對演出唔緊張，因為秘書處都有安排時間畀佢哋同樂團夾吓，而且安排咗一個佢能夠勝任嘅位置畀佢，所以演出都絕對冇問題。
當日嘅音樂會其實係「與立法會議員暢談」計劃嘅其中一部分，到時將會由青年音樂訓練基金負責演出，一共演出五首歌，包括《Trumpet Voluntary》、《江河水》、《MOY孩子的話》、《萬水千山縱橫》、《Auld Lang Syne》。