政情：土地諮詢問卷錯電話 打攪園境師
土地供應專責小組日前已展開第二階段公眾諮詢，但份問卷就問題多多，除咗被指過於簡陋，內容選項少而有傾向性，亦發現問卷最尾嘅電話寫錯咗！土地供應專責小組正確電話應係「3509 7737」，而問卷最尾個電話就誤寫成「3509 7377」！連電話都寫錯埋，唔知到底係一時大意，定係有心逃避市民嘅查詢呢？
每日都收到幾個電話
另一邊廂，到底打「3509 7377」會搵到邊個呢？原來係發展局園境師（綠化及園境）張家維嘅辦公室電話，據知因為份問卷寫錯電話，所以依家每日都有幾個電話打錯畀張家維，雖然都係發展局嘅同事，而且電話數量唔算好多，但持續落去都會造成一定困擾，土地供應專責小組都係快啲改番佢，同埋下次咪咁求其，睇清楚先至公布喇！