政情：張宇人打針淆底 巴西睇肉團恐變甩底團
立法會搞巴西「睇肉團」隨時變「甩底團」！原本立法會食物安全及環境衞生事務委員會（委員會）計劃今年八月去巴西，了解當地肉類處理同進出口檢疫情況，有人話治安麻麻，又要事先打疫苗，結果只有七人報名，點知連副主席郭家麒都甩底，加上委員張宇人同非委員陸頌雄亦都唔去，最後得番「四壯士」，其中譚文豪都係一半半機會唔甩底，立法會外訪須三人成團，如果其中一個打完疫苗唔舒服，呢個團都隨時消失，團長何俊賢（高佬賢）話希望神恩庇佑，各位團友身體健康喎。
張宇人係倡議去巴西考察嘅，原本仲約好去打疫苗，但問過醫生有冇副作用，醫生就話佢年紀大、風險高，可能會有腎衰竭同腦膜炎。張宇人幾年前已經攞咗長者卡，佢問醫生如果同佢一樣年紀會唔會打疫苗，對方答佢，如果好想去睇老虎等動物就會去打，如果退休冇乜嘢做就考慮吓。張宇人諗起喺「睇肉團」前後要去歐洲見客，唔想家人擔心，就決定取消打疫苗唔去嘞！
譚文豪都話未必去
除咗張宇人淆底之外，郭家麒就只係講咗句唔去就行開咗，陸頌雄同樣都唔去，雖然佢早前報咗名，但當時已表明係高佬賢叫佢「剔住先」，最終要視乎暑假工作安排再決定。至於已報名嘅委員譚文豪依家都係得一半機會去，佢話問過秘書處，行程包括去農場同屠房，未必睇到佢想睇嘅嘢，建議去睇吓凍肉裝櫃、肉商代表團、當地議員等等，不過佢都預約六月中打疫苗，最終去唔去就要視乎行程改唔改嘞！
何君堯自誇好重要
依家必去嘅得番兩男一女，高佬賢、委員黃碧雲（一舊雲）同非委員何君堯，何君堯即刻大讚自己好重要，係關鍵人物，所以要去。一舊雲就大嘆依家變成「甩底團」，少一個都唔得，又發現打疫苗前同打緊期間都唔可以病，否則會影響針效，加上有啲人打完疫苗會有不良反應，未必去到，隨時唔夠三人成團，真係危危乎呀！
高佬賢話約咗七月打疫苗，好彩約遲咗，因為近日唔舒服都唔打得，打完疫苗要十日後先有效，要約打疫苗又唔容易，如果任何團友病咗，預約當日打唔到，可能打唔切，依家少一個都唔得，咁樣落去，要考慮呢個時間去係咪最好。問佢會唔會改期，佢就話不排除任何可能喎。