中環出更：回收基金行政費高 郭振華幫黃錦星平反
回收基金近日被批評行政費用過高，環境局局長黃錦星更被議員形容係「大嘥鬼」。回收基金諮詢委員會主席郭振華（Jimmy）尋日出席一個企業環保頒獎禮時，為黃錦星平反。Jimmy話回收基金並唔係提款機，唔係一收到申請就批錢，要先評估技術等方面係咪可行之後，先決定係咪批出撥款，有時仲會為申請者提出反建議改善計劃。
要評估視察 唔會亂批錢
Jimmy話回收基金有十億元，依家先批出一億元，壓力都好大，各同事加班都想快啲批錢出去，但申請計劃唔得，就唔可以批錢，試過有申請者掛名係回收業，但聽到基金要派人去視察，就話唔繼續申請，亦試過基金派人評估某申請者嘅計劃時，發現申請者想買嘅機器，根本無法製造出計劃中嘅膠製品，更有部分計劃錯估市場價格，基金評估後，發現計劃無法持續可行，呢啲計劃全部都要調整，過程中涉及評估及視察等工作，唔會亂咁批錢。
對於有議員批評回收率嘅問題，Jimmy就話回收涉及市場因素，例如若膠粒價格低，就根本冇人肯收膠，加上每個項目都需要幾年時間先見到成效，回收基金亦唔係喺成立初期已批出所有錢，應該再過幾年先評估香港回收率，咁樣對基金先公平。
卓妮