中環出更：劉國勳獲女排簽名排球 只認出郎平筆迹
中國女排一向深受港人支持，前晚佢哋更喺香港體育館，同日本隊上演中日大戰添，吸引唔少政界人物入場為國家隊打氣。有份做啦啦隊嘅立法會議員劉國勳，事後更獲得中國女排成員嘅簽名排球，但佢竟然話啲簽名太潦草，淨係認得總教練郎平嘅簽名喎。
劉國勳話細個嘅時候試過打排球，但係用雙手手腕接波搞到勁痛，加上讀書時代排球被認為係女生玩意，所以最後都走咗去打籃球同踢足球。直至○四年雅典奧運，佢見證中國女排喺大幅落後下，反勝俄羅斯奪金，見到班隊員嘅鬥志同毅力，自此就成為中國女排嘅粉絲。咁中國男排呢？佢笑言男子排球嘅節奏太快，相反女排就欣賞到組織攻勢同救波防守等，所以只會睇女排。
身兼行政會議成員同立法會議員嘅張國鈞（Horace）亦帶埋老婆同兩個囡囡入場打氣，佢話原來部分香港人唔知紅館嘅正確名稱係香港體育館，又以為紅館淨係開演唱會，相信呢一場排球大戰可以提醒公眾紅館嘅用途之一。Horace又話今次除咗帶兩位囡囡欣賞中國女排嘅球技外，亦有教導佢哋要尊重對手，「如果日本隊打得好，應該以掌聲欣賞，唔可以去噓」。不過呢，Horace嘅細女年紀始終較細，所以冇乜耐性睇賽事，反而不斷央求爸爸去同球賽嘅吉祥物影相。
譚志源觀賽好雀躍
當晚去捧場嘅，當然唔少得出名係女排超級粉絲嘅政制及內地事務局前局長譚志源（Raymond），佢同太太一齊入場觀賽，顯得好雀躍。Raymond由中學開始就打排球，對排球運動情有獨鍾，兩年前政府喺禮賓府宴請女排，佢不停咁同班隊員Selfie，興奮到不得了。
卓妮