有句說話係咁講嘅：「天堂是英國人當警察、法國人當廚子、德國人當工程師；地獄是德國人當警察、英國人當廚子、法國人當工程師。」查實英國佬何止煮嘢難食，搞工程一樣唔掂，可惜港府高官偏偏唔信邪，結果咪搞出個大頭佛囉。
呢，港鐵近日就高鐵試車出軌事件發表調查報告，話係英國顧問公司設計軌道承托力嗰陣「計漏數」，令軌道承受嘅橫向壓力比預期大，搞到高鐵列車尾卡車轆同路軌出現二至三吋偏離喎。所謂「橫向壓力」，簡單講就係指列車轉彎時將乘客身體往反方向拉嗰股力量，係工程界嘅ABC，堂堂知名顧問公司竟然咁都計得漏，如果唔係瞌眼瞓，就梗係好似港鐵主席馬時亨咁講，「朝早可能無祈禱」嘞。
話時話，廣深港高鐵香港段花咗八百幾億公帑，蹉跎十幾個寒暑，點知慢工出劣貨，漏水甩轆樣樣齊，醜到出國際。真係諗極都唔明，當今世上中國高鐵技術獨步全球，點解香港反而捨近求遠，係都要搵英國顧問公司合作？
好心官老爺擘大雙眼睇清楚，莫講話俄羅斯總統普京訪問中國都要點名試坐高鐵，連英國佬喺自己老家起高鐵都要搵中國人幫手。有數得計，同樣起條高鐵，中國人用嘅時間比外國少好多，成本亦平一大截，性價比冇得彈，係人都識揀喇。港產官僚對英國佬投懷送抱，千揀萬揀揀着個爛燈盞，講到尾都係戀英慕殖嘅奴性作怪。
大家有眼睇，香港話就話回歸祖國二十年，升嘅旗亦由米字旗換成五星旗，但港英餘孽們嘅效忠對象，就只有佢哋自己至知。好簡單，以前英國人做主人，香港所有大型工程就話英國佬玩晒啫，點知時至今日港府仍然迷信英國佬英明神武，當正神咁拜，結果就係肥水專流外人田。班洋人搞得企企理理都算嘞，可惜事實啱啱相反，淨係講今次呢間英國公司，除咗高鐵出軌事件，之前有份參與嘅橫洲發展、港珠澳大橋等，唔係捲入醜聞就係有工人不幸喪生，港官唔理好醜，但求搵英國佬幫手，話唔係奴才DNA深入骨髓，講都冇人信。
難為港官口頭愛國一個比一個肉麻，唔係見五星旗眼濕濕，就係封今上為最有魅力政治領袖，實則一個二個黃皮白心，有人仲話退休後想返英國「老家」養老添，港府上上下下仲有幾多身在漢營心在曹嘅無間道，真係無人話得埋。北大人咪強調國民教育嘅，計功夫茶話齋，港產高官們連愛嘅係中國定英國都傻傻分不清楚，國民教育由佢哋做起就差唔多！