政情：外傭風波再補鑊 容海恩雙語貼文賣口乖
新民黨立法會議員容海恩上星期喺立法會大會口頭質詢，稱外傭每逢假日喺公眾地方聚集及進食，影響市民日常生活同環境衞生嘅言論捱轟。
容海恩繼日前親自接收外傭團體請願信，並表示「非常抱歉」，尋日再喺Facebook補鑊發出貼文向外傭「賣口乖」，表明會同外傭一齊爭取應有權益。
話明白離鄉別井嘅困難
容海恩嘅外傭影響衞生言論，引起外傭團體猛烈抨擊，佢尋日於Facebook，以中英文雙語貼文，再次談及同外傭團體交流嘅事件，佢首先話外傭對本地家庭及香港經濟發展貢獻毋庸置疑，又十分明白外傭離鄉別井所面對嘅種種困難，佢重申，大家都係懷着同一目標，就係要求政府提供更佳聚腳點畀外傭。
容海恩之後再為早前提問內容解畫，話若然有關內容對外傭有任何唔尊重地方，對此表示唔好意思，「因為這絕對不是我的原意」，佢表明會同外傭一齊爭取應有權益。唔知容海恩咁多次補鑊，表示同外傭企喺同一陣線，一眾外傭團體又會唔會收貨呢？