政情：陳沛然SMS嗶嗶響 被笑仲用Call機
傳呼機（Call機）已經愈嚟愈少人用，皆因其功能已逐漸被手提電話取代，仲用緊Call機嘅人已經相當少數。尋日嘅立法會人事編制小組委員會上，醫學界議員陳沛然發言時身上突然傳出嗶嗶聲，就惹來一班議員關注，搞到有人好驚訝咁問「仲用Call機？」換來一陣笑聲。
仲話有時比手機好
陳沛然當時已喺會上解釋指醫生要用Call機，而事後向佢查詢時，佢就直言Call機有時比手機優勝，好似地庫同角落等手機信號差嘅地方，Call機都仍然能夠運作到。不過，佢其實已經無用Call機多年，因為維修服務只限辦公時間，而且服務費用唔平咁話，所以唔少醫生都改用電話短訊（SMS）取代Call機。
既然佢身上無Call機，咁到底係咩發出嗶嗶聲？陳沛然話自己將SMS鈴聲改做Call機響聲，因為響起時其他人都覺得有正經事，可以避免尷尬情況。至於今次收到SMS並唔係醫院有事，而係立法會秘書處提示輪到佢發言啫！