政情：社區主任遭性騷擾備案 陳恒鑌支持站出來
立法會議員陳恒鑌地區辦事處嘅社區主任鄧麗玲疑遭一名男子性騷擾，尋日到警署備案，佢相信自己並非唯一受害者。陳恒鑌就話事件對鄧麗玲造成一定困擾，認為佢不啞忍嘅決定正確，會留意有關情況，佢又提醒有關人士，需為其行為付出代價，希望可盡快「收手」。
曾邀約單獨外出
鄧麗玲回覆查詢時話該名男子聲稱係佢服務嘅社區居民，自舊年九月已不斷致電滋擾佢，期間曾邀約單獨外出約會，佢已斷然拒絕，更向對方明言如要協助可到辦事處。佢又話尋日再次接到該名男子來電，該男子嘅說話愈嚟愈露骨，最後仲話正看着佢嘅照片作出猥褻行為，要求佢「幫埋（佢）今次」，就承諾唔再來電。
佢強調起初該名男子都係好客氣嘅，自己亦冇諗咁多，但尋日嘅對話實在太過分，先決定報警。佢話自己並唔懦弱，作為地區工作者會遇上唔同嘅人及事，但絕不縱容性騷擾行為，相信警方會作出調查及處理。