欲卸之責，何患無詞。這邊廂，私營院舍質素良莠不齊，虐老醜聞層出不窮；那邊廂，資助院舍供不應求，唔少老人家等到含恨而終。明知安老問題不斷惡化，偏偏港府一味關人個關，仲大條道理敷衍塞責，話係冇人性都冇冤枉。
唔使廿年，每三個港人就有一個係長者，面對高齡海嘯殺埋身，林鄭下巴輕輕，話要做好安老規劃，仲話要「宿位零輪候」，講就好聽咯，弊在光說不練呢。勞福局局長羅致光話喎，興建安老院舍唔容易，由覓地到落成，八年搞掂已算樂觀，更多時候要十幾年，都未計請人難呢一筆。佢老哥就賴九七金融風暴令港府出現財赤，搞到安老規劃被叫停，即使院舍起好亦唔夠資源增加服務，財政理由加上政治理由，問題積重難返，家陣要追落後就好吃力。即係千錯萬錯，都係前朝嘅錯啫。
真係頂佢唔順咯。當時環球經濟動盪，港府慳住使無可厚非，之但係金融風暴已經係咸豐年前嘅事，香港經濟早已翻咗幾番，家陣財政及外匯儲備接近三萬億元，港府肥到襪都着唔落，有咁多錢都解決唔到安老問題，又唔肯及早做好規劃，擺明係不為也，非不能也。
即係咁，要求港府起多啲安老院舍，高官就話地從何來啫，咁退而求其次，上調院舍人均面積，等老人家住得舒服啲，應該有得傾喇啩，點知都係托手（月爭）。大家有眼見，家陣安老院舍人均面積得六點五平方米咁大把，活動空間連囚犯都不如，呢個規定仲要廿幾年唔變，唔止不合時宜，根本唔人道。可惜吖，一講到增加人均面積，高官就好似業界代表上身咁款，唔係煞有介事話會令院舍經營困難，就係發晦氣話咁做即係將老人家趕去瞓街，港府好似完全冇責任咁，聽到人火都滾埋。難為社署仲裝模作樣成立小組檢討，咪畀功夫茶批中，最後又係走過場嘅咋。
鬼咩，港產官僚個個高薪厚祿，公務員有豐厚退休金唔在講，高官一樣有可觀嘅約滿酬金，退休後去私人機構搵真銀又得，巧立名目翻閹又得，點似得基層市民有後顧之憂，臨老過唔到世吖。針唔拮到肉唔知痛，林鄭同羅致光之流，梗係唔會明白基層長者生活有幾咁艱難，林鄭當年仲甜絲絲話要返英國退休添，安老院舍環境差都唔關佢事啦。
冇計嘞，港府嫌貧棄老，殘民自肥，高官仲自爆庫房啲錢要用嚟支付公務員退休金。睇到喇，市民年年準時交稅，到頭來福利全無，血汗錢仲送晒畀高官享受，你話呢個政府有冇良心o架？