中環出更：林定國自爆 唔知沖金魚落廁所犯法
資深大律師都唔係識晒所有法律o架，大律師公會前主席林定國（Paul）出席一個基本法問答比賽時自爆，聽到比賽其中一條題目時，先知道喺屋企沖金魚落廁所係犯法o架，真係覺得好驚訝，呢件事喺佢細個嘅時候做咗好多次，真係中招啦！
覺得好多法例冇人用
阿Paul話當場問身邊另一位律師，發現原來可能係涉及一條有關處理動物屍體嘅法例，不過阿Paul都唔知金魚算唔算係動物，又覺得好多法例其實冇人用嘅，警察都難以知道係咪有人沖走金魚屍體落廁所。
佢又話喺比賽中，有唔少問題佢都答唔到，見到啲同學答到，佢都覺得驚奇同佩服，雖然參賽者可能聽日已經唔記得啲題目，但最緊要係刺激大家對憲法、本地法律等嘅興趣，依家好多爭議同吵吵鬧鬧都係涉及法律，普通市民難以判斷邊啲係啱，應睇番到底爭拗緊啲乜嘢喎。
卓妮