中環出更：計劃開舖撞正殺街 陳家偉失預算
油尖旺區議會最近通過「殺街」動議，取消旺角行人專用區，呢個決定就有人歡喜有人愁喇，包括香港中華廠商聯合會常務會董陳家偉（Calvin），事關佢早前講過想喺行人專用區附近物色緊舖位做生意，話行人專用區會吸引人流，而且「有人聚點都好過冇人聚」，所以先想去附近開舖，好彩佢仲未搵啱舖位，依家仲可以從頭計劃過。
香港潮屬社團總會早前舉辦換屆就職典禮，主席陳幼南同一眾核心成員都有出席，場內亦見到金紫荊女企業家協會常務副會長林淑怡嚟撐場。提起行人專用區，Calvin都話如果有啲表演喺正舖頭前面，而個表演又真係好大聲嘅話，對做生意多少都有啲影響，佢亦明白如果搵過另一個地方畀人表演唔係咁容易，就算只係過一條街都未必咁有地標性，所以最重要都係視乎啲表演會唔會太過分。
黃進達：表演者要珍惜場地
香港旅遊業議會主席黃進達就話最重要係平衡，人車爭路嘅問題固然要處理，但近年嘅行人專用區就實在有啲擠擁，認為香港都可以學吓外國專門劃啲區畀人表演，點都好過依家表演者同商戶對立嘅局面。佢仲話表演者都要珍惜公眾表演嘅地方，唔能夠一句「我有權表演」就乜都唔理囉！
百仁基金副主席余偉傑同女友、九龍潮州公會青委方溢就話，西洋菜街實在太嘈太擠擁，所以去旺角都好少行入去。余偉傑仲話如果表演者喺正舖頭門口表演，一來搞到舖頭員工要承受噪音，二來搞到啲客急急腳走，或多或少都會影響做生意，所以取消咗，佢覺得冇乜嘢，又話香港仲有好多有特色嘅地方，例如近近哋廟街都已經係喇！
卓妮