唔知大家有冇留意，德國默大媽再度訪華，開到口話好期待到訪深圳。梗係啦，深圳唔止係中國改革開放四十年嘅標誌城市，近年仲成為全國科技重鎮，默大媽想開吓眼界一啲都唔出奇。反觀一河之隔嘅香港近年愈做愈縮，競爭力跌跌不休，只能斯人獨憔悴。
講起競爭力，香港真係唔爭氣。呢，瑞士洛桑管理學院發表最新嘅全球競爭力報告，連續兩年排第一嘅香港今年跌落第二位，畀去年排第四、連升三位嘅美國取代，老對手新加坡就排第三。報告話喎，香港喺政府效率同營商效率仍然排第一，經濟表現仲上升兩位排第九，之不過基礎建設評分暴跌，只能排二十三。反觀美國喺經濟表現同基礎建設均排第一，此消彼長咯喎，香港咪痛失桂冠囉。
表面睇，香港今年嘅排名唔算太失禮，之但係逆水行舟，不進則退。莫講話歐美國家同新加坡步步進逼，淨係深圳喺短短十年間一躍而成中國硅谷，科技巨擘紛紛落戶，GDP仲超越埋香港，連默大媽都青眼有加，就知今年中國競爭力排名躍升至全球十三位，絕對唔係僥倖。香港再唔急起直追，排名遲早跌到阿媽都唔認得嘅咋。
當然喇，港府高官永遠唔知醜字點寫，仲沾沾自喜話報告再次肯定香港係全球最具競爭力的經濟體之一喎。又難怪佢哋冇危機意識嘅，事關份報告話港府效率同營商效率全球第一，令人抓晒頭。是但問個香港人都知，港府辦事出名拖拖拉拉，議而不決嘅老毛病一直戒唔甩，加埋垃圾會政客拉布流會阻住地球轉，香港近年發展陷於癱瘓咁滯。除咗講句低處未算低，其他政府施政效率比港府更不堪，真係唔知呢個第一係點解釋咯。
再講吖，香港營商效率可能係唔錯，但營商環境就認真不敢恭維。報告細項排名已反映一切，香港喺「物價」方面僅排六十一，證明百物騰貴，不宜居更不宜商。尤其係高樓價、高租金呢兩座大山，連跨國企業都大叫吃不消，呢個問題搞唔掂，營商效率幾高都補唔番。至於基礎建設排名差強人意更係意料中事，睇吓近年大型基建無一不延誤，無一不超支，塞車有如家常便飯就一清二楚。
俗語話，爛船仍有三斤釘，弊在香港呢艘爛船，靠嗰三斤釘唔知可以捱幾耐。就講科技基建吖，係香港排名第二低嘅項目，話係香港嘅短板都冇誇張。當全世界都落重米搞創新科技，當深圳呢個細佬都早已拋離香港十條街，港產官僚仲一味吹水唔抹嘴，永遠停留喺「願景」階段，香港競爭力每況愈下，真係好合情合理o架！