油尖旺區議會尋日通過「殺街」，要求政府研究取消旺角西洋菜街行人專用區，多名議員喺會上仲鬧爆當年畀運輸署呃咗，甚至叫署方應對當年嘅決定謝罪問責，批評署方為專用區產生嘅始作俑者，但就「生仔唔養仔」。點解班議員咁氣憤？睇吓依家專用區搞成點就知喇，噪音擾民、烏煙瘴氣，區議會傾咗咁多年，要求政府諗辦法改善，但問題冇解決之餘，仲每況愈下，班議員谷到爆，署長陳美寶點都要硬食喇！
