政情：建制泛民不滿分配 立會外訪組合大洗牌

赴英了解脫歐 共9個免費名額

委員會計劃九月中組團去英國倫敦同愛丁堡訪問，同當地議會交流兼了解英國脫歐情況，呢次係今屆委員會首次嘅外訪團，到時九個免費名額點樣分配？

除咗一個名額由葉建源同副主席梁繼昌協調出一人「穩袋」之外，其餘八個就分配畀唔同嘅議員組合，由各組合協調或抽籤選出代表使用名額。委員會原先制訂嘅組合，最惹起爭議嘅係由民建聯、自由黨、經民聯同工聯會等建制大板塊，合共分為兩組獲分配五個名額，呢兩組平均七個議員爭一個名額；相反民主派喺剩低嘅名額中，有兩個名額平均十個議員爭一個，最後一個名額熱血公民鄭松泰等人更加要同何君堯、吳永嘉同陳健波等一批獨立建制派去爭添！

至於更新後嘅議員組合，就將建制派同民主派議員完全分開，建制陣營分成四個組合，一共獲分配五個名額；而民主派就分成三組同有三個名額，兩個陣營平均每八人獲分配一個。葉建源接受本報查詢時承認舊版本嘅議員組合，被民主派批評偏心建制派，同時建制方面亦有人不滿獨立議員要同民主派議員爭，希望更新組合後盡可能令最多人滿意。

何君堯接受查詢時承認對分配組合有意見，佢認為同一政黨嘅議員，政治理念都相近，所以政黨派一個代表外訪就夠，唔需要咁多名額，相反獨立議員更需要名額去出席表達立場，認為舊版本不利獨立議員爭取名額。此外，據悉建制派六人組之中，亦有人質疑點解六人被「打散」喺唔同組別，擔心影響「中籤率」咁話。至於鄭松泰接受查詢時就話，無論點樣分組去分配名額都會有唔公平嘅質疑，佢建議全體議員直接抽籤，人人聽天由命就唔需要煩惱公平問題。

為咗安撫兩派陣營，免費名額分配嘅組合要重新洗牌，但新嘅組合版本又係咪協調到抑或需要抽籤去爭，委員會稍後就會再開會討論，大家拭目以待嘞。