政情：保釋喵星人 鄺俊宇撲空
去警署保釋「人」就聽得多，如果去保釋「貓」又試過未？前日傍晚，元朗區議員兼立法會議員鄺俊宇（Roy）喺屋企同自己隻貓「商量」咗一陣，借咗兩罐貓罐頭就出發去元朗警署，嘗試人生首次保釋貓，可惜最後空手而回。據了解，Roy要保釋貓家三母子，係一宗案件嘅「證物」，前晚已被愛護動物協會職員接走照顧。
屬證物 暫交愛協照顧
Roy話前日下午警方喺元朗拘捕一人涉嫌販賣貓隻，案中涉及一隻貓媽媽及兩隻貓BB都同時被「扣押」返警署，唔少網友擔心貓家三母子去向如何，會唔會被人道毀滅，又擔心入咗「證物房」會無食物，向佢尋求協助。佢立即聯絡警方，但都未能得到最新資訊，所以Roy就同佢隻貓「咪咪」借罐頭，直接去警署了解情況。幸好經一輪交涉後，警方確認涉案貓隻屬證物，喺案件完結前都會交由愛護動物協會照顧，Roy先安心離開，但今日會繼續跟進貓貓的最新情況。
另外，佢講到自己隻貓即刻「貓奴」上身，強調借咗兩罐罐頭好嚴重，如果食咗一定要買番畀「咪咪」，唔知係咪驚「主子」發脾氣嬲佢呢？而「咪咪」已經十多歲，算係貓長者，但原來佢係貓伯伯，Roy好尷尬話，當初以為係女仔先叫「咪咪」，半年後驚覺係男仔都無改名，反正叫開嘞。