政情：羅智光任由公務員流失被轟佛系思維

被斥冇應對措施 賴自然流失

立法會公務員及資助機構員工事務委員會尋日召開會議，羅智光喺會上簡介公務員編制同辭退等概況，勞工界議員何啟明就話現時公務員辭職率為百分之○點六三，較以往公務員亦享有長俸時高出三倍，直言現時公務員壓力大，且退休後失去長俸同醫療等福利，因而導致辭職率升高，又問到當局有乜嘢方法減低公務員嘅辭職率。

另一名議員郭偉強就批評當局只有數字，冇應對措施，將一切歸類為自然流失，批評係「佛系思維」，重申公務員退休潮係大問題，當局唔能夠掉以輕心。

面對議員批評，羅智光只係話六成嘅辭職係發生喺試用期內，原因或與工作唔適合或其他原因有關，而有關數字亦較一五至一六年度微跌百分之○點○二，似乎公務員辭職並唔係因工作上有問題，又話當局會同每名離職公務員會面，了解離職原因，而現時大部分公務員招聘時，申請人數遠多於職位空缺嘅數目。

公務員學院選址 擬集中市區

對於公務員學院選址方面，羅智光指某啲公務員課程只舉辦一至兩小時，故選址會集中喺市區、交通方便地點，而現時喺北角舉辦課程嘅地方將來會合併喺學院內，但目前嘅選址並唔係喺中環，而將來亦唔代表唔可以喺離島等偏遠地區舉辦課程。佢又話目前除咗硬件問題，軟件亦喺度籌劃中同需要提升，所以公務員學院仍未可以開幕。

另外，會議上亦發生一段小插曲。話說喺會上交代下次會議日期喺六月十五日星期五舉行，有別於尋日喺星期一早上開會。議員蔣麗芸聽後就好不滿，因為佢身兼教育事務委員會主席，而下次會議嘅時間同佢主持教育事務委員會嘅時間相同，反問如果佢打算就重要議題提意見時，係咪要佢喺另一個會議上提出休會，等佢完成發問後先恢復會議，直言有關安排唔可行。但佢之後再度詢問下次會議日期後，再低頭查看手機，之後先改口連聲話「冇撞到，冇撞到」。睇錯日期而又鬧錯人嘅佢之後隨即表明收回反對，在座嘅泛民議員亦不禁偷笑。