中環出更：港青默默耕耘 彭耀佳大讚

由國際青年商會香港總會舉辦、每年一度嘅十大傑出青年選舉尋日正式啟動並已經接受提名，會長簡汝謙、本年度嘅籌委會主席梁嘉恩當然有份出席見證，而活動上亦見到唔少前傑青得主，好似鄭家豪同耿曉靈等。彭耀佳就話今次出任首席評審，同以往評審工作有所分別，因為要引導大家作討論以尋求共識，但就強調首席評審唔係大晒！

彭耀佳仲透露，以往不時出現乞求接受提名嘅情況，呢啲情況都出現喺傑出青年協會前主席姜炳耀身上，事關佢當年非常抗拒接受傑青提名。姜炳耀解釋，係因為自己背景而覺得當選係天方夜譚，所以先咁抗拒接受提名囉。佢又憶述當年嘅情況，指提名佢嘅太平紳士，因為覺得佢嘅經歷夠勵志而游說咗佢好多次，到最後仲要發脾氣鬧佢「係咪男人嚟o架」，佢先肯簽名接受提名，而佢亦因為呢個經歷，試過鍥而不捨去游說其他人接受提名。

姜炳耀（左）當年經多番游說先接受傑青提名，旁為簡汝謙（中）及梁嘉恩（右）。

鄭家豪（右）同耿曉靈（左）都話當選傑青後對社會有更大嘅承擔。

陳家強冀傑青帶來正能量

過去長時間喺「熱廚房」嘅財經事務及庫務局前局長陳家強，今年則首次擔任評審，佢話朋友圈中都有唔少人對傑青選舉有興趣，所以覺得今次選舉頗受重視。佢就希望可以憑傑青選舉，為社會帶來具正能量嘅故事，因為社會上唔少青年嘅想法負面，覺得欠缺向上流動機會、樓價高昂等問題，但其實好多地方都面對同樣問題，認為唔應該忽略咗香港獨特嘅機遇，所以希望藉傑青去改變青年消極嘅睇法囉！

卓妮