小學生寫紀念冊最興呢句︰「萬里長城長又長，我倆友誼比它長。」其實諗真啲，比萬里長城長嘅又何止「友誼」吖，淨係公屋輪候冊條人龍，已經係最佳例子喇。
房委會前日公布最新公屋平均輪候時間，創出五點一年嘅十八年來新高，而最得人驚嘅係，根據房委會資助房屋小組主席黃遠輝嘅講法，現時公屋供應不足，未來五年每年平均只有兩萬三千個公屋單位可供編配，難以應付十五萬份一般申請，預計未來情況會繼續惡化。如果撞啱嗰期有市區公屋供應，條隊仲會再長啲添。佢老哥「打定輸數」，分明玩緊期望管理，等市民有心理準備，就算第時輪候時間「破六」，都可以鬧少兩句。
公屋僧多粥少，無殼蝸牛望樓興嘆，連豬欄、雞棚改建嘅劏房都要照殺，早就搞到民怨沸騰，面對呢個老大難問題，當局除咗「出口術」，最叻就係「玩篤數」。好似今期新落成公屋咁，當局靜雞雞將出售嘅「綠置居」計埋入出租公屋條數度，擺到明偷換概念，欺騙市民。
港產官僚呻覓地難呻到樹葉落，唔係賴地區反對，就係賴團體阻撓，但其實只要精神不滑坡，辦法總比困難多，對於點樣增加土地供應，其實民間不斷有人獻計。尋日之嘛，鄉議局主席劉業強就建議政府重新規劃偏遠鄉村地帶，支持非村界內嘅鄉村式發展土地以公私營合作方式發展，用嚟起丁屋及公屋，淨係上水天平山，就可以提供三至四公頃土地。可惜吖，當局嘅反應又係耍手擰頭，話有技術困難喎。
冇錯，上述建議涉及敏感嘅丁權問題，好容易引發「官鄉勾結」爭議，激化矛盾，但咁唔代表官老爺可以翹埋雙手等運到。大家有眼見，無論係填海好，打郊野公園主意又好，收番少數權貴尊享嘅遊樂場用地，甚至係善用長期丟空嘅政府宿舍同校舍都好，港產官僚通通講多過做，既擺唔平既得利益者，遇到反對聲音亦只會腳軟跪低，所謂「寸土必爭」、「見縫插針」，根本得個噏字。咪畀人批死，港府係威係勢搞咗個咩「土地大辯論」，最終又係淪為「吹水會」，一事無成嘅咋！
唔怕貨比貨，最怕唔識貨。新加坡面積細過香港，人口密度高過香港，但人均居住面積居然係香港嘅兩倍，唔到你唔服。最近有民調顯示，喺眾多施政領域裏面，受訪者對房屋政策評分最低，證明市民嘅眼睛係雪亮嘅。廢柴高官連市民安居嘅卑微願望都滿足唔到，憑咩(逗)高過美國總統嘅人工吖！