政情：劉小麗私生活「變化多端」
被取消立法會議員資格嘅劉小麗，去年被踢爆喺台灣南部墾丁沙灘，與一名四眼男手拖手戲水，引起網民熱議。劉小麗尋日出席一個論壇時，就被問起佢嘅感情事，佢就回應話，希望大家都係專注喺社會議題上，又話私生活「變化多端」，唔需要大家過分關注。唔通佢嘅感情狀況起變化？
趁母親節派花
今日係母親節，劉小麗尋日喺論壇舉行前後趁節日在即派花畀市民。被問到母親節會唔會同男朋友屋企人食飯，劉小麗就話︰「呢啲就唔答啦」，貫徹佢一向唔多談私事嘅作風。
劉小麗唔熱衷講私事，但對立法會事務就「偉論」多多。佢喺論壇上提及「拉布」，話啲人成日話拉布阻工程，搞到起唔到公屋等，呢樣嘢佢就唔認同，認為政府工程會提早招標，所以拉布唔會影響招標，亦唔會令建築工人冇飯開。佢仲話拉布反而有助民生，因為如果政府想通過工程，就要游說民主派，民主派就可以爭取多啲民生項目喎。建造業多次舉行反拉布集會，睇嚟都好難認同劉小麗嘅講法喇。