政情：霸多半個車位 龐愛蘭被斥區議員大晒
香港泊車位長期不足，沙田區議員龐愛蘭（Scarlett）竟然一架車泊兩個車位，惹來霸佔車位疑雲。有網民就將Scarlett座駕停泊喺華景山莊停車場嘅相片上載至社交網站。睇相可見，Scarlett嘅座駕停喺前後兩個車位中間，即係霸咗人哋半個車位。有網民留言質疑係咪區議員大晒，仲話應該要鎖車添！
持續幾年 稱方便上落同周末洗車
有網民留言話，Scarlett泊車霸咗人哋半個位嘅情況已經有幾年，過往都被投訴過，只係後面車位車主怕事，情願泊其他位。我哋向Scarlett查詢，佢承認網上照片中嘅車輛係其座駕，前面個車位係佢擁有，但後面個車位係其他業主嘅。因為佢架車比較大，如果旁邊泊咗車，佢就好難上落車︰「大家都知我鍾意着裙，唔通我爬去後座出咩？」故此佢先將座駕泊後少少，亦方便佢周末洗車喎。
Scarlett又話，由於後面車位已經五、六年冇泊車，所以佢先至放心咁樣泊喎。至於佢嘅解釋理由合唔合理，相信自有公論。