中環出更：戴耀廷教刪Fb港獨言論 誤導靠呃防DQ？
近日盛傳主張港獨自決人士參選明年區議會選舉都會被取消資格（DQ），違法佔領行動（佔領中環）發起人戴耀廷尋日出席一個論壇時就預計，前立法會議員劉小麗都係被DQ嘅高危一族，預計明年區選，民主派可能有十多二十人被DQ，又教政治素人若有意參選，要刪除社交網站Facebook的港獨自決言論，相信有關方面現時無法事先「造圖（cap圖）」。嘩，咁咪即係教人呃人以防被DQ？
戴耀廷主張協調民主派組成聯盟參加區選，但佢被指支持港獨，會否連累參加聯盟人士被DQ？戴未知係咪自知「身有屎」，似乎想「割席」，指自己並非聯盟成員，聯盟係由參選人士組成，佢只係政治紅娘，「兩個人結婚，關個紅娘乜事呢？」
違法佔領 債未還又搞事
戴又提到，區選要叫人投票，「如果我要你走去街頭佔領，嘩！咁大代價，依家又拉又鎖，緊係唔好啦」，但投票係低投入、低風險，但若區選成功係高回報，好似買六合彩咁喎。講真嗰句，戴耀廷正正就係搞違法佔領，搞到包括佢在內的人被「又拉又鎖」，現時舊嗰筆債未還，估唔到又喺度蠱惑人心搞事。
此外，曾任雙料議員的民協馮檢基預計不會出戰明年區議會選舉，計劃去幫多幾個黨友助選，效益更大，除非「風雲計劃」最終唔夠人落晒全部選區，馮檢基才可能出選。
卓妮