中環出更：劉燊濤童年曳事 屋企踢波整爛地主
今日係母親節，又係歌頌偉大母愛嘅時候。卓妮尋日喺沙田馬場見到香港工業總會青年委員會名譽會長劉燊濤（Gary）同細佬劉燊霆陪媽媽梁淑賢入場。講起小時候嘅曳事，Gary笑稱試過同細佬喺屋企踢波，結果踢爛咗地主，認真大件事。以為兩兄弟實要食「藤條炆豬肉」啦，點知Gary就話冇喎，最後都只係被父母話兩句咁啫。
講番呢件事，作為媽媽嘅梁淑賢都話有些少印象，但已經唔記得係踢爛地主咁大鑊，初時佢仲話係整爛福祿壽擺設添。佢又笑笑口話，兩個仔都算乖，細個犯錯都會被打，但係依家啲小朋友就唔打得嘞！至於有兩個囝囝嘅Gary都好同意，話個仔唔乖時最多罰企，因為唔會留低表面傷痕喎。
張德祥夫婦打扮儒雅唔怕熱
打又唔打得，咁小朋友有乜嘢驚？Gary太太Daphne就話三歲嘅大仔怕警察，事關有次交通警察截停佢哋架車，個仔見到戴住頭盔嘅交通警就好驚，自此如果佢曳曳，就攞差人出嚟嚇一嚇，咁就掂晒。
轉頭見到香港西區婦女福利會永遠名譽會長張范元芳同做男裝高級訂製生意嘅丈夫張德祥，尋日天氣好悶熱，但係佢哋仍然一貫江浙人儒雅打扮，着得好體面。張太笑稱可能着慣咗，唔覺得熱。張德祥就話，所以佢哋會喺全球搵通爽透氣嘅布料，令男士喺夏天着西裝都涼爽啲。
香港鐘表業總會前主席梁青華（華哥）都有入場，佢笑逐顏開話，正籌備七月份喺九龍一個大型商場開瑞士錶專門店，事關估計高鐵通車後將帶來可觀人流。記得去年八月華哥結束尖沙咀零售店，轉往樓上過零售業寒冬，咁快就見到市道由谷底回升，難怪佢開心笑晒。
卓妮