香港郵政出名多醜聞，烏龍甩漏嘢多到天光都數唔晒，難怪長期成為審計報告嘅重點招呼對象，呢嗱，話口未完又有新猷喇！
話說香港郵政今年元旦起上調郵費，本地平郵信件由個七加到兩蚊，一次過加一成半，飛擒大咬都算嘞，最離譜係配套安排蝸行龜步，市民認真多得佢哋唔少。有讀者向本報投訴，早排喺香港仔寄信畀朋友，郵筒上標示嘅郵費仍然係個七，不以為意下照跟，點知冇耐後收到朋友通知，郵政署話郵費仲爭三毫子，連同罰款盛惠六毫子。咁都算嘞，事隔差不多半年，呢位讀者再去上述郵筒睇過，發現標示居然未更新，狠批香港郵政辦事不力。
最離譜嘅係，郵政官僚好似四方木咁唔踢唔郁，係都要等到記者查詢至急急補鑊，期間都唔知幾多市民聽佢哋老點畀漏郵費。冇錯，一個幾毫跌咗都唔使恨，但累到朋友費時失事四圍撲就唔好喇。大家不妨想像吓，如果有人寄情信向暗戀多年嘅女神表白，結果因為貼唔夠郵票，而對方又懶得去拎，大好姻緣從此毀，到時搵邊個算帳？
咁香港郵政又點解畫呢？佢哋話喎，該署已透過發布新聞稿、喺報章賣廣告以及電台播放宣傳聲帶等，多管齊下進行宣傳，言下之意即係市民自己唔得醒目。查實加郵費呢單嘢，莫講話一般人唔為意，連最關心時事嘅政界人士都未必知。呢，今年初立法會補選，就有候選人嘅宣傳單張貼漏郵票，搞到選民要去郵局補交罰款，媽聲四起，都唔知係咪因為咁流失選票鎩羽而回，你話香港郵政係咪好帶挈吖。
話時話，家陣又到報稅季節，功夫茶有必要向大家溫馨提示。原來稅局喺一六至一七年收到八萬封郵費不足嘅報稅表，涉及費用超過廿四萬元。如果報稅表冇寫回郵地址就會被銷毀，而納稅人亦可能因為逾期報稅，被罰款一萬大元以及徵收稅款嘅三倍，問你怕未。
大家有眼見，香港郵政起勢加價，服務質素卻不斷插水，「失信於民」多過食飯唔在講，郵局仲同銀行分行一樣，摺吓一間又一間；奇就奇在即使一味諗縮數，香港郵政數簿都仲係年年見紅。鬼咩，呢頭cut budget削服務，慳埋慳埋都唔夠畀員工加班費喇！正如好多人質疑，今時今日寄信嘅人買少見少，郵政署工作量竟然不減反增，話中間冇蠱惑嘢，三歲細路都唔信！
計功夫茶話齋，要解決郵政服務低劣嘅問題，話都冇咁易，乾脆摺埋等佢哋唔使再提供服務，咁至係治本之道吖嘛。